De resinsje fan Jenny: By beppe útfanhûs
“At mem fuort moat mei it fleantúch, kin lytse Maaike net mei. Derom sil Maaike by beppe útfanhús. Maaike pakt har kofferke en nimt fan alles mei. By beppe dogge se tegearre allegearre leuke dingen, mar dochs fielt Maaike har net hielendal bliid. En as Maaike op bêd giet en yn de nacht wekker wurdt, mist se har mem en moat se gûle. Maaike wurdt ûnwennich, lokkich wit beppe rie en mei Maaike by beppe yn it grutte bêd sliepe.”
Wat is dit in moai boek fan Mirjam van Houten. Der steane prachtige platen yn dy’tsto wiidweidich besjen en beprate kinst mei de bern. Ik ha it boek foarlêzen oan ús famke fan 5 jier. Us dochter fan 7 kin it boek al hielendal sels lêze. It is foar harren in werkenber ûnderwerp, want ús trije famkes geane ek witte faak by harren “beppe sûkerskeppe” útfanhús.
En harren beppe hellet, lykas de beppe fan lytse Maaike, ek alles út de kast om it de bern nei it sin te meitsjen. Knutselje, bakke, ferskûlboartsje… kinst it sa gek net betinke, beppe fynt alles goed.
Lokkich hawwe se eins nea lest fan ûnwennigens, mar it allinne sliepen is somtiden al efkes in útdaging. Doe’t dat dan ek yn it boek barde wie it earste wat ús famke sei “hee, dat docht ús beppe ek altyd as ik net allinne doar te sliepen” en doelde dêrmei op de beppe fan Maaike dy gau by har yn bêd krûpte.
Wy sille it boek de folgjende kear dat yn fan de bern útfanhús giet by beppe mar meijaan yn it kofferke, want foarlêze heart fansels ek by útfanhûzje.
Jenny van der Meer út Kornhorn
-> Jenny is lid fan it Afûk-boekpanel. Wolsto dy ek oanmelde, boeken tastjoerd krije en dêr wat oer skriuwe? Sjoch dan hjir foar mear ynformaasje.
By beppe útfanhûs
Mem moat fuort en Maaike sil by beppe útfanhûs. Beppe fynt fan alles út, mar wat letter it wurdt, wat mear Maaike har mem mist. Beppe wit ried, mar no kin beppe sels net mear sliepe…
In prachtich printeboek, geskikt foar bern fan 4 jier en âlder.
De resinsje fan Anne: ‘By beppe útfanhûs’
In hiel werkenber ferhaal oer útfanhûzje. Fan it koffer ynpakken, beppe dy’t alle war docht om it moai en noflik to meitsjen, oant it útswaaien by it wer nei hûs ta gean fan Maaike. It famke giet net faak by beppe útfanhûs, tink ik, want se moat al hast gûle by it ôfskied fan mem. Fierder yn it boek hat se ek nochal krap. By it pankoekiten, yn bad en as Maaike op bêd leit fansels.
Boekresinsje ‘Wêr is myn skaad’ troch Tietsje
Super leuk, ik mei it boek “Wêr is myn skaad?” mei de bern lêze! Ik bin fuortendaliks entûsjast, want wat sjocht dat boek der prachtich út.
Sa lêze wy thús: Baukje Snieder
Baukje is troud mei Wymer. Soan Mads is yn maaie 3 jier wurden en yn juny krijt Mads in lyts broerke.
